LAOAG CITY – Inadmitir ni Barangay Kagawad Venancio Daquioag iti Barangay 44, Zamboanga ditoy ciudad ti Laoag a kinaryar na ni Joel Ganal Jr.
Daytoy ket gapo kunana a saan na a malapdan ti bagbagi na no makita na ti Ganal.
Ummuna iti daytoy, kuna ni Daquioag nga idi adda da iti minatayan ket napan ti agnagan ti Michael kadakuada gapo ta maipagarop a kinaryar met isuna ni Ganal.
Kunana a daytoy ket gapo iti kalapati a maipagarop a mapukpukaw a kukuna ni Michael.
Segun kenni Daquioag, nakainom isuna iti napan iti pagtaengan ti pamilya Ganal ken intudo-tudo na daytoy ngem saan na nga ammo a nakarekord.
Inpetteng na a saan a mabuteng no maipakita ti video iti biang ti Bombo Radyo Laoag tapno maamoan ken rumwar ti kinapudno.
Inbatad na nga idi nakita na ni Ganal ket saan na manen a nalapdan ti rikna na ket intudo-tudo na, ken kinaryar na gapo iti basol ti maseknan nga inawagan na a panagtatakaw.
Inlawlawag na a napasamak daytoy gapo ta ti para lako iti tianggi na nga agnagan ti Erika Pablo ket maipagarop nga agit-ited ti kwarta iti tao nga ibaon ti asawa ni Joel Ganal a ni Jenifer Dulnuan.
Nupay kasta, kunana nga iti panagsasarita da iti barangay ket napagtutulagan a saanen a mapan iti nasao a lugar dagiti agasawa ken agbayad da ti lima a ribo a pisos kas sukat ti kwarta.
Mainaig iti daytoy, inistorya met ni Ganal ti napasamak no kasano a nagtennag a kinaryar ni Barangay Kagawad Daquioag isuna.
Segun kenni Ganal, idi napan nagayab ni Michael ti opisyal ket nabartek met ni Daquioag ken ditoy a nagsasao ti dakes gapo iti maipagarop nga adda dagiti mapukpukaw iti baragay da ken isuna ti mapabpabasol.
Inpetteng na a ni laeng asawa na a ni Dulnuan ti madi mabalin a sumrek iti barangay da nga adda iti kasuratan.
Kunana a bayat nga agasasao ti dakes ni Daquioag ket nagtugtugaw latta ken arig na makasangit gapo ta maipagarop a dumarop pay ti kagawad.
Mainaig iti daytoy, inbatad ni Ganal nga inadmitir met ti asawa na a dimmawat ti kwarta ngem nalpasen a napagtutulagan ken adda iti kasuratan nga agbayad daytoy.
Kabayatanna, inbatad ni Barangay Chairman Elmer Lorenzo a saan na a nakita ti napasamak.
Nupay kasta, kunana a basar kenni Barangay kagawad Daquioag ket adda ti nalabsan da nga agrirriri a dua a babai ken kas maysa nga opsiyal ket napan na nagresponde.
Kunana a basar iti naipadanon kenkuana ket nakita ni Daguioag ni Ganal ken ti asawa na.
Inlawlawag ti kapitan a kalpasan ti sumagmamano a minutos ket napan ni Ganal iti balay ken inistorya na ti napasamak seknan iti maipagarop a panagsasao ti kagawad.
Inbaga na met kenni Ganal nga adda ti basol na gapo ta ammo na a naka-ban ti asawa na iti barangay da ngem inkabil na latta daytoy.
Mainaig iti daytoy, kuna ni Lorenzo a ti adda laeng maiparit a sumrek iti barangay da ket ni Dulnuan.
Nupay kasta, inbatad pay ti kapitan a saan a daytoy ti ummuna a gundaway a napan ti asawa na iti barangay da iti laksid a maiparit.
Innayon na a saan da a tininggar ti kaadda ni Dulnuan iti barangay da ngem maipagarop nga inbatad ni Daquioag nga arig na mangin-insulto dagiti agasawa gapo ta ammo da ti sitwasyon da iti nasao a lugar ken saan da a sinurot ti katulagan.
