LAOAG CITY – Inlawlawag ni Dr. Joan Corpuz, Schools Division Superintendent ti Department of Education ditoy siudad ti Laoag ti isyu mainaig iti “position for sale” wenno “item selling” iti Schools Division Office.
Segun kenkuana, saanna pulos nga inaramid daytoy a banag iti las-ud ti pito a tawenna nga agserserbi kas Schools Division Superintendent.
Inbatadna a naiget a sumursurotda kadagiti pagannurotan maipapan iti panangpili kadagiti aplikante para iti maysa a posision.
Inlawlawagna nga iti panangidaulona ket naannad daytoy a mangipatpatungpal maipanggep iti hiring wenno appointment no sadinno nga adda ti nabukel a Personnel Selection Board nga isu ti maysa kadagiti kangrunaan a mangtingiting ken mangarisit kadagiti aplikante babaen ti written examination, interview ken dadduma pay.
Kunana a naiget a maisaysayangkat ti selection process tapno mapili ti nasken a makaala ti maysa nga item ti departamentoda.
Innayonna nga awan ti kabagianna nga inapointaranna kabayatan ti panagtugawna kas Schools Division Superintendent.
