LAOAG CITY – Naipaiman kadagiti 64 a public ken private schools ti elementaria ken sekondaria ditoy siudad ti Laoag dagiti metal detectors nga immunan nga inkari ti city government babaen ken ni Mayor James Bryan Alcid kas paset ti security and preparedness initiative ti gobierno siudad kadagiti educational institutions.
Naamoan nga 128 ti pakabuklan a bilang dagiti naibunong a metal detector a kangrunaan a gagemna a maleppedan ti pannakaserrek ti paltog ken immuko wenno natatadem a banag para iti seguridad dagiti indibidual nga agturturong kadagiti pagadalan.
Nagatendar iti aktibidad ni Assistant Secretary Gervy James Gumarit, Commissioner National Youth Commission, dagiti opisiales ti Department of Education ti siudad, school heads ken teachers.
Inbatad ni Alcid a prioridadna ti seguridad ti tunggal maysa ken ar-aramiden ti administrasionna ti amin a mabalin a wagas tapno mapapigsa ti public safety kadagiti pagadalan.
Kabayatanna, nagyaman ti Department of Education wenno DepEd Laoag gapu ti alisto a pannakapaay dagiti metal detectors kadagiti amin a pagadalan ti siudad.
