LAOAG CITY – Maiyalud-od ti budget hearing ti Sangguniang Panlalawigan gapu iti agsasaruno a bagyo a dumuprak ditoy probinsia.
Segun ken ni Bokal Donald Nicolas, Chairman ti Committee on Appropriations, ti nasao a tignay ket kalpasan a kiniddaw daytoy ti Budget Officer kadakuada.
Gapu iti daytoy, inlawlawagna a manipud iti orihinal a naikeddeng nga iskedyul manipud iti Nobiembre 19 agingga 23 ket mapagbalin a Nobiembre 26.
Babaen iti daytoy, kunana a maikkan ti naan-anay pay a panawen dagiti Department Heads a mangadal ti ilungalongda a pundo para kadagiti maseknanda a pangopisinaan.
Maipalagip nga inpakaammo ti Sangguniang Panlalawigan a ti naudi a panangipasa ti proposed budget ket idi Oktubre 17.
