LAOAG CITY – Inpasingked ni Senate President Francis “Chiz” Escudero a saan a maapektaran ti budget hearing ti Senado iti agtultuloy nga imbestigasion iti Senado kadagiti dua a wanted nga isuda dati a Bamban, Tarlac Mayor Alice Guo ken Pastor Apollo Quiboloy.
Inbatad ni Escudero, ti nakaapektar iti panangtingiting ti 2025 proposed budget dagiti ahensia ti gobierno ket ti napasaran a panaglayos ken sumagmamano nga aldaw a pannakasuspenso ti trabaho gapu iti Bagyo Enteng.
Kunana nga adda ti umdas a committee rooms ti Senado tapno mangiyuswat ti tunggal komite ti panagdengngeg.
Inpetteng ti liderato ti Senado, awan pay ti budget hearing a nasuspenso gapu laeng iti imbestigasion maipanggep kada Guo ken Quiboloy.
Nupay kasta, inlawlawag ni Escudero, iti kanito a talantanen iti plenario ti mailunglungalong a linteg ket saan a mabalin a mangisayangkat dagiti nagduduma a komite ti panagdengngeg kas basar iti pagannurutan ti Senado.
