LAOAG CITY – Mangisayangkat ti Buhawind offshore wind farm ti public consultation iti ili ti Burgos inton Hulio 17.
Segun ken ni Mayor Cresente Garcia iti nasao nga ili, babaen iti daytoy ket maammoan ti pribado a kompania no ania ti pudno a takder wenno reaksion dagiti residente kangrunaanna kadagiti mangngalap nga ad-adda a maapektaran iti pannakaipasdek ti offshore wind farm.
Inlawlawagna a saan daytoy a kontra iti pannakaipatakder ti renewable energy ngem para kenkuana ket saan a mabalin a maipasdek daytoy iti paset ti kabaybayan gapu ta adu ti madadael kas ti corals.
Inbatadna a no maipursige daytoy a proyekto ket dakkel ti epektona kadagiti mangngalap iti lugar nangruna ket daytoy ti kangrunaan a pagsapulan ti kaadoan a residente iti ili ti Burgos.
Kunana a no bilang maipatungpal ti pannakaipasdek ti offshore wind farm ket dakkel ti posibilidadna nga addanton iti paset ti kabaybayan a maipawil a pagkalapan ken pannakaipatungpal ti no fishing zone.
Mainaig iti daytoy, inpakaammo ni Mayor Garcia nga adda ti panangiwayat ti kompania maipapan iti kinapigsa ti angin iti lugar kangrunaanna iti Barangay Bobon, Pagali ken Saoit.
Innayonna nga adda ti sumurok-kumurang 70 a wind turbine ti posible a maipasdek iti kabaybayan iti ili ti Burgos.
Kabayatanna, naammoan nga uray dagiti kameng ti Philippine Marines ket saan nga umanamong iti pannakaipasdek ti offshore wind farm iti kabaybayan iti ili ti Burgos no sadinno nagisubmitirda pay ti surat iti opisina ti Mayor a mangibagbaga a maapektaran ti komunikasion ken ship maneuvering-da no naan-anay a maipatungpal ti nasao a proyekto.
