LAOAG CITY – Kiniddaw ti Business Permit Licensing Office iti Sangguniang Panlungsod a maiyalud-od ti deadline ti business permit renewal ditoy ciudad ti Loaag.
Daytoy ket gapu ta umab-aboten pay laeng iti 1,296 ti nakapagparenew ti business permit da.
Segun ken ni Mrs. Antonette Bareng ti mangidadaulo ti Business Permit Licensing Office ditoy ciudad, bassit pay daytoy a bilang gapu ta umabot iti 6,000 a pasdek negosyo ti agop-opearar ditoy ciudad.
Maipalagip a ti inisyal a panagngudo ti renewal ti busines permit ket inton Enero 20, ngem nakadepende iti konseho no aprobaran da ti kiddaw ti ahensya.
Immuna iti daytoy, kiniddaw ti mangidadaulo ti Business Permit and Licensing Office ditoy siudad ti Laoag a masapul a susurwen dagiti busines owners ti agaplikar iti online tapno al-alisto ti pannakaiproseso dagiti business permitda.
Segun kenkuana babaen iti daytoy a wagas ket mapalag-an ti proseso a pagdalananda ken agturongda laengen iti Business Permit Licensing Office tapno agbayad ken mangala ti permit.
