LAOAG CITY – Kinumpirmaran ni Mayor Cresente Garcia iti ili a Burgos a temporaryo pay laeng a napaserraan iti Cape Bojeador Lighthouse.
Segun kenni Garcia, delikado pay laeng nga agturong iti nasao a lugar gapu ta adda ti paset na nagreggaay ken nakurukoran ti sirok ti kalsada nga umuli iti Lighthouse.
Inlawlawag na a temporaryo pay laeng a napaserraan tapno maliklikan dagiti turista iti aksidente.
Innayon na a naipadanon metten daytoy a problema kenni Goberador Matthew Marcos Manotoc.
Inpakaammo payen ni Sen. Imee Marcos iti sitwasyon ti Lighthouse iti National Historical Institute, Department of Public Works and Highways ken dadduma a maseknan nga ahensya ti gobierno para iti pannakatarimaan ti nasao a pasdek.
