LAOAG CITY – Maluksaw ti pamilya ni Ms.Najan Aladen ditoy ciudad ti Laoag kalpasan a natubtob ti panchon ti ama na iti Chinese Cemetery iti Brgy. 1 ditoy ciudad ti Laoag babaen kadagiti saan pay a nabigbig a suspek.
Segun kenkuana, napan da binisita ti nakaitaneman ti ama na ket ditoy a nakita da a natubtob ti baba ken ngato a paset ti panchon na.
Malaksid iti panchon ti ama na ket natubtub pay ti kaabay na a nakaitaneman ti agnagan ti Cecilia Almazan ken napukaw ti kwarta a naipabalon kenkuana.
Apaman a naduktalan da ti pannakatubtob ti panchon, dagos da met nga inreport ti napasamak iti Philippine National Police isut gapuna nga adda dagiti napusgan nga agronda iti lugar.
Innayon na a manipud napasamak daytoy, inaldaw dan a mapan sarungkaran ti nakaitaneman ti ama na ken plano da a paaladan.
Inpakaammo ni Aladen a pimmusay laeng ti ama na idi Enero 12 ita a tawen.
