LAOAG CITY – Epektibon ti ceasefire iti nagbaetan ti Israel ken Lebanon ita a biernes, Abril 17.
Namnamaen a mangisardeng daytoy iti innem a lawas a rinnupak iti nagbaetan ti Israel ken Lebanese armed group nga Hezbollah.
Iti baet ti panagbalin nga epektibon ti ceasefire, agtultuloy ti panangipabanto ti rocket ti Hezbollah iti northern Israel idinto a naireport dagiti panagatake ti Israel kalpasan ti kagudua ti oras idi nagepekton ti ceasefire.
Inpetteng met ti Israel nga agtalinaed dagiti tropa kadagiti lugar nga inokupar da iti southern Lebanon.
Adda metten dagiti Lebanese a nangrugi nga agsubli iti southern Lebanon a nagbalin a sentro dagiti panagatake ti Israel, ken mapapati a kuta ken ado dagiti presensiya ti Hezbollah.
Kabayatanna, sumagmamano nga umili iti nagduduma a paset ti Lebanon ti nagdirdir-i iti kalsada gapu iti kinaragsak da kalpasan a naiwaragawag nga epektibo ti ceasefire.
Inawat met ti Iran ti 10 nga aldaw a ceasefire ngem nagpanawagan para iti naan-anay a panagsanud dagiti tropa ti Israel manipod idiay Lebanon.
Positibo met ni US President Donald Trump a maaddaanen ti katulagan tapno ileppas ti gubat iti Iran kalpasan ti ceaserfire agreement ti Israel ken Lebanon.
