LAOAG CITY – Nangidiaya ti Ukraine iti Russia ti temporario a ceasefire kadagiti sibilian a target iti Black Sea kalpasan nga immadu dagiti panagatake kadagiti barko ken pantalan nga us-usaren iti panag-export kadagiti produkto nga agrikultura ti pagilian.
Nangipatulod ti Kyiv ti idiaya iti babaen ti maysa a third party nga agur-uray pay ti sungbat manipud Moscow.
Ak-akusaran ti Russia ken Ukraine ti tunggal maysa ti panagatake kadagiti barko nga us-usaren kadagiti exports-da.
Naammoan a likliklikan dagiti dadduma a shipping companies ti dumalyasat iti Odesa a napateg a sentro ti grain exports ti Ukraine.
Nupay kasta, napilitan nga insuspenso ti Russia ti operasion iti tallo a terminal iti Black Sea port ti Novorossiyksk kalpasan ti maipagarup a panagatake ti Ukraine a mabalin a makaapektar iti grain exports ti Moscow.
Kabayatanna, inbatad ni Russian Deputy Foreign Minister Alexander Grushko nga awan pay ti naaw-awatda a pormal a kiddaw para iti ceasefire iti Black Sea.
