LAOAG CITY – Nailungalong iti Senado ti gakat a pannakaipawil ti panagusar ti mobile device ken electronic gadgets kadagiti pagadalan iti oras ti klase.
Iti babaen ti Electronic Gadget-Free Schools Act wenno iti Senate Bill No. 2706 nga inpila ni Sen. Sherwin Gatchalian, sakupen ti gakat dagiti agad-adal iti kindergarten agingga iti senior high school kadagiti pampubliko ken pribado a pagadalan. Maipawil pay kadagiti mangisursuro ti panagusar kadagiti mobile devices ken electronic gadgets iti oras ti klase.
Nupay mamati ni Gatchalian a napateg ti papel dagiti mobile devices ken electronic gadgets iti edukasion, inpettengna a mabalin a mariribukan latta daytoy iti panagadal nangruna no makaistorbo daytoy iti panagadal dagiti estudiante.
Rimmuar iti resulta ti 2022 Programme for International Student Assessment (PISA) a 8 kadagiti 10 nga agtawen ti 15 nga agad-adal ti naipadamag a mariribukanda iti panagusar ti smartphone iti klase.
Agpada ti bilang dagiti estudiante ti nangibaga a mariribukanda ti panagusar dagiti dadduma nga agad-adal ti smartphone iti oras ti klase.
Rumrummuar pay iti resulta ti Programme for International Student Assessment ti pannakariribuk a mangitunda ti panagusar ti smartphone iti panagbaba ti 9.3 points iti mathematics, 12.2 points iti science ken 15.04 iti reading.
Nupay kasta, adda dagiti gundaway a mabalin nga agusar dagiti smartphones ken electronic gadgets kas kadagiti classroom presentation ken dadduma pay nga aktibidad.
Iti 2023 Global Education Monitoring Report, 13% a dagiti pagilian iti intero a lubong nga adda dagiti linteg a mangipawpawil wenno naiget iti panagusar ti mobile phones kadagiti pagadalan idinto nga 14% dagiti addaan ti pagannurutan, estratehia wenno dagiti pagalagadan para iti kapadan a gagem.
