LAOAG CITY – Ginutigot ti City Environment and Natural Resources Office dagiti residente ditoy siudad ti Laoag nga agturong iti opisinada tapno agkiddaw ti forest trees a mabalinda nga imula.
Inbatad ni Mrs. Mylene Pascual, mangidadaulo iti nasao nga opisina, napintas a gundawayan iti panawen ti panagtutudo tapno agmula ti adu a kayo a dakkel a makatulong tapno malapdan ti erosion kasta metten agserbi kas dakkel a tulong iti panawen ti kalgaw a mangipaay ti paglinongan dagiti tattao.
Kunana a no adda dagiti kayatna ti agmula ket mabalinda nga agkiddaw ti opisinada babaen ti Barangay Chairman dagitoy.
Inpasingkedna a no adda ti kastoy a mapasamak a panagkiddaw ket adda ti panag-lecture ti opisinada maipanggep iti panagmula, panangtagiben ken panangpadakkel.
Innayonna nga adda pay ti panagsapatada nga imula, protektaran ken padakkelenda a nasayaat dagitoy.
