LAOAG CITY – Nakasagana ti Commission on Higher Education (CHED) nga agimbestigar iti maipagarop a panaggatang ti diploma dagiti estudyante a Chinese iti probinsya ti Cagayan.
Iti maysa nga statement, inbatad ni Commission on Higher Education Chairman Prospero De Vera III a daytoy ket maysa a seryoso nga alegasyon nga agaw-awat dagiti unibersidad kadagiti gangannaet nga estudyante ken kwar-kwartaan da laeng dagitoy.
Immunan a kinumpirmaran a mismo ti Commission on Higher Education ti kellaat a panagado dagiti Chinese student enrollees iti maysa a pribado nga unibersidad idiay Cagayan.
Inpetteng na a saan da nga agpangadua a mangiyuswat ti imbestigasyon ken siguradwen da a maipatungpal ti due process para iti amin nga adda ti pakainaigan na iti partido.
Kabayatanna, nagyaman ti Commission on Higher Education ken ni Senador Francis “Chiz” Escudero ken dadduma pay nga agpanpanday linteg a nangirakurak ti pannakaalarma na iti nakainaigan ti sumagmamano a Chinese students iti Cagayan a maipagarop nga agbaybayad ti dakkel a kantidad tapno makaala ti academic degree uray saan da a nakumpleto dagiti kasapulan nga academic requirements.
