LAOAG CITY – Pagpalpalawagen ti Korte Suprema ni Senate President Vicente “Tito” Sotto III mainaig iti petisyon a mangkidkiddaw a daytoy ket ma-cite iti indirect contempt gapu iti maipagarop a rakurak na a mangkweskwestyunara iti nagbalin a desisyon ti kangatoan a korte idi 2025 iti impeachment complaint kontra ken ni Vice President Sara Duterte.
Iti resolusyon a naiparuk-at idi Abril 8 ken naipublikar idi Mayo 4, naikkan ni Sotto ti 10 nga aldaw tapno mangisumitir ti sungbat na.
Naipila ti petisyon babaen ti sumagmamano nga abogado ken personalidad a nangibaga a dagiti nagbalin a rakurak na ket mabalin a makadadael iti panagtalek ti publiko iti hudikatura.
Dinakamat dagiti petitioner ti nagbalin a desisyon ti Korte Suprema a nangibasura iti impeachment complaint, gapu iti maipagarop a panaglabsing iti one-year rule ken iti karbengan iti due process.
Basar kadakuada, maipagarop a naglabes iti “fair commentary” dagiti nagbalin a rakurak ni Sotto ken mabalin a mangipababa iti dignidad ti Korte.
Inkalintegan met ni Sotto a maysa laeng daytoy a “nuisance suit” ken publicity stunt.
Inpalgak na a ti panangirakurak iti saan a panangpabor iti desisyon ti korte ket paset ti nawaya a panagtimek ken saan a maibilang a contempt no awan ti nalawag a pananglapped iti administrasyon ti hustisya.
Inpaganetget na pay nga iti babaen ti Rules of Court, ti indirect contempt ket agkasapulan ti akto a makalapped wenno makadadael iti proseso ti hustisya, maysa a banag a saanna nga inaramid.
