LAOAG CITY – Naarestar ti Chief Tanod babaen ti Search Operation iti Sitio Vira, Barangay 20 Callusa iti ili ti Piddig.
Nabigbig ti suspek a ni Roderick De Leon, agtawen ti 48, naasawaan ken residente iti nasao met laeng a barangay.
Basar iti Piddig Municipal Police Station, naiwayatan ti Search Operation ti suspek gapu iti panaglabsingna iti Republic Act No. 10591 wenno ti Comprehensive Firearms and Ammunitions Law nga inparuk-at ni Hon. Bonhoefer V. Bernardez, Executive Judge ti Regional Trial Court, Branch 4 ditoy siudad ti Laoag a napetsaan idi Abril 8, 2025.
Mainaig iti daytoy, kabayatan ti panagsukimat dagiti otoridad ket nakumpiskarda ti maysa a maipagarup nga hand grenade, maysa a pouch bag nga agmaris ti nangisit, maysa a calibre 38, dua a live ammunition, uppat a live ammunition ti calibre 45, 15 nga empty shell ti caliber 45 ken dua nga empty shell ti maipagarup a calibre 38.
