LAOAG CITY – Pagbusbusuren ti China Coast Guard dagiti suldado ti Philippine Navy iti panangip-ipitda iti West Philippine Sea tapno dagitoy ti umuna nga agpaputok ti paltog.
Ti rakurak ket inaramid ni Navy spokesperson for the West Philippine Sea Commodore Roy Vincent Trinidad, kagiddan ti pannakasugat dagiti pito a suldado no sadino maysa kadagitoy ket naputed ti ramayna idinto a mangisayangkat ti rotation and resupply mission iti Ayungin Shoal.
Inbatad ni Trinidad nga ar-aramiden ti China ti amin tapno maibaga nga immuna ti Pilipinas a nagusar ti armas.
Binuttawan ti China Coast Guard ti rigid-hulled inflatable boats ti Pilipinas ken kinumpiskarda dagiti paltog dagiti suldado.
Iyur-uray laeng ti China ti maysa a panagbiddot ti Pilipinas tapno adda kadakuada ti takder iti karebbengan.
Nangiruar pay dagiti ladawan ken bidyu dagiti otoridad a makita ditoy dagiti armado ti patadem ken wasay dagiti kameng ti China.
Inpasigurado ni Trinidad a saanda nga agpaapektar ti Pilipinas iti awan sarday a panag-bully ti China ken maiyallubog iti linet ti amin nga aramiden a tignay ti Pilipinas.
Kuna ni Trinidad a maaddaan ti maiyannatop a panagbalbaliw tapno maipasigurado nga awan ti miembro ti Pilipinas ti madangran.
Kinondenar met ti Pentagon ti Amerika ti inaramid ti China nga inawaganda a “provocative, reckless, and unnecessary.”
