LAOAG CITY – Nakagun-od ti world record ti maysa a Chinese Origami Artist kalpasan a nakaaramid isuna ti artwork manipud iti atiddog a papel.
Kinumpirmaran ti records keeping organization a Guinness World Records a ni Pei Haizheng ti world record holder ti titulo a “Longest Strip Cut from One Sheet of Paper.”
Daytoy ket kalpasan a nakaaramid daytoy ti artwork manipud iti maysa a pedaso ti papel a kinartibna iti naimpis nga addaan ti 354 feet ken nine inches.
Ti artwork a naaramid ni Pei manipud iti papel ket agsukog ti utek ken inikkanna daytoy ti titulo a “Between Chaos and Order.”
Saan a nagbalin nga alisto para ken ni Pei a mabukel daytoy gapu ta dimmanon ti maysa a tawen a nagsanay tapno maperpekto ti panagkartib ti naimpis iti maysa a pedaso a papel a saan a maputed.
Inbatad ni Pei, nangrugi isuna nga agaramid kadagiti artwork manipud iti papel sipod idi ubing pay laeng agingga a nasursurona pay ti agaramid ti origami.
Dakkel a pammadayaw para kenkuana a maaddaan ti Guinness World Records nga adda ti pakainaiganna iti origami ken paper artworks.
