LAOAG CITY – Inpakaammo ni Dr. Rodrigo Catcatan, ti mangidadaulo iti City Health Office ditoy ciudad ti Laoag a manarimaan iti panangirehistro da kadagiti umili nga agturturong iti opisina da para iti Philhealth Yakap Program wenno Yamang Kalusugan Program.
Segun kenkuana, accredited ti City Health Office ditoy ciudad iti nasao a programa ken dakkel a makatulong kadagiti umili ti libre a nagduduma a seribiso kas iti laboratory, konsultasion, screening, medisina ken dadduma pay.
Kunana a ti maysa nga ar-aramiden da ket iti panagsursor iti nagduduma a barangay ditoy ciudad ti Laoag tapno masigurado a magundawayan dagiti residente ti nasao a programa.
Innayon na a malaksid iti daytoy ket adda pay ti Alisto Medical Mission ken ti programa a Purok Kalusugan a mangidanon ti libre a serbiso medical.
