LAOAG CITY – Saan a nagatendar dagiti kameng ti City Engineering Office, Bureau of Fire Protection ken Ilocos Norte Water District kabayatan ti regular session ti Sang Panlungsod ditoy ciudad ti Laoag.
Daytoy ket kabaliktaran ti inpanamnama ni Mayor James Bryan Alcid iti kallabes nga agatendar dagiti maseknan tapno sungbatan dagiti concern ni Konsehal Jason Perera mainaig kadagiti main-instolar a fire hydrants ditoy ciudad.
Maipalagip nga immunan nga inlawlawag ni Konsehal Perera a nangiyalokar ti konseho ti 100 a ribo a pisos iti kada fire hydrant ken basar iti City Engineering Office ket agbalor amin ti P4.5-milyon a pisos dagiti fire hydrants.
Nupay kasta, inpetteng ti konsehal a ti nailanad a balor dagiti fire hydrants ket saan a maiyannatop iti itsura dagiti nasao a produkto gapu ta bassit unay.
Kunana pay a malaksid iti pondo ti fire hydrants ket sabali pay ti 10 ribo a pisos a naiyalokar a budget ti prime water, ngem no kitkitaen ket ipaay a libre ti nasao a kompanya ti danom a maisupply kadagitoy isut gapuna a nalaklaka koma pay ti presyo dagiti nasao a produkto.
Immunan nga inbatad ni Mayor Alcid a rumbeng a sungbatan dagiti maseknan nga ahensiya ti nasao nga isyu gapo ta ti maysa a kalikagom ti administrasyon na ket agbalin a transparent.
