LAOAG CITY – Iberberipikar ti City Health Office ti naireport a tallo a kaso ti kamuras iti Mariano Marcos Memorial Hospital and Medical Center idiay ciudad ti Batac.
Daytoy ti inbatad ni Dr. Alicia Agbayani, mangidadaulo ti nasao nga opisina.
Segun kenni Agbayani, adda ti sursuruten dagiti ospital a privacy act no sadinno a saan a mabalin a maala ti estado ti kaso kadagiti pasyente.
Nupay kasta, kunana a beripikaren na ti datos manipud iti Department of Health seknan iti nasao a sakit tapno maamoan no taga-sadinno dagiti addaan ti kamuras.
Kabayatanna, iti agdama ket naiget ti panagmonitor ti opisina da ti kaso a kamuras ken adda ti nakitaan da nga addaan ti sintomas ti sakit.
Inlawlawag na a kalpasan ti panangeksamin da ket negatibo met laeng ti resulta na.
