LAOAG CITY – immapela ni Mrs. Mary Jane Leaño, ti Officer-In-Charge iti City Tourism Office ditoy ciudad ti Laoag, iti publiko wenno dagiti agturturong iti Laoag Sand Dunes iti panagbalin a disiplinado ken responsable iti panagibleng iti umiso a pagbasuraan kadagiti basura da.
Segun kenkuana, awan serbina ti kanayon a panangpamintas kadagitoy a pagpasiaran no ado met dagiti basura a makita nga agkaiwarang.
Kunana a rumbeng a maibasura iti umiso a pagbasuraan dagiti basura tapno agtalinaed a napintas ti buya iti lugar.
Inaramid daytoy ni Leaño kalpasan nga adda dagiti post iti social media maipanggep kadagiti basura iti Laoag Sand Dunes.
Inpetteng na nga adda dagiti pagbasuraan a pangikabilan kadagiti basura dagiti agturturong iti lugar ngem adda latta dagiti awan disiplina na ken saanna nga ammo ti agibelleng iti umiso a pagbasuraan.
Innayon na a tapno mapagtalinaed ti kinapintas ken kinadalos dagiti lugar a pagpasyaran ditoy ciudad ti Laoag ket kasapolan iti naan-anay a panagtitinnulong wenno kooperasion.
