LAOAG CITY – Naragsak nga inpakaammo ni Ms. Loelyn Acain, ti Officer in Charge ti City Accounting Office ditoy siudad ti Laoag a naipatungpalen ti Class A a sueldo dagiti public health workers ditoy siudad.
Segun kenkuana, malaksid iti daytoy ket maawatda pay ti midterm bonus a dakkel a tulong kadagiti maseknan nga empleado.
Inbatadna a karaman a makaawat iti daytoy ket dagiti health workers nga agpapaay iti City Health Office ken iti Laoag City General Hospital.
Inlawlawagna a saan met a karaman ditoy dagiti nurse nga agpapaay iti Department of Public Safety gapu ta maibilang dagitoy kas Job Order.
Kabayatanna, maragsakan met ni Dr. Joseph Adaya, ti mangidadaulo iti City Health Office gapu ta isuna ti kangrunaan a nangikagumaan ti pannakaipatungpal ti Magna Carta for Public Workers banag a nabayagen nga ipatpatungpal dagiti dadduma a lugar ditoy probinsia kas iti siudad ti Batac.
Innayonna a nasurok a duapulo a tawenen nga inlabanna daytoy a banag nga ibilangna nga isu ti legacy-na sakbay nga agretiro iti serbisio.
