LAOAG CITY – Nagpalagip manen ni Atty. Julius Balbas, Comelec Officer ditoy ciudad ti Laoag a nasken a suruten dagiti kandidato ti sizes dagiti campaign materials da ken adda iti common poster area.
Segun kenni Balbas, naikkan dan ti notice dagiti kandidato iti national level ditoy probinsya dagiti lugar a pakaikabilan kadagiti campaign materials da nga inyetnag ti Comelec.
Inbatad na a maikabil dagiti campaign materials iti bisinidad ti barangay halls ken mabalin iti plaza no indesignar ti election officers, kasta met kadagiti daldalanan dagiti tattao.
Inpetteng na a kadagiti mausar to a pagbutusan intono kaaldawan ti eleksyon ket saan a mabalin a pagikabilan kadagiti campaign materials.
Kunana pay a maysa laeng ti lugar a maestablisar para iti political party ken ditoy a mabalin da ti agusar ti streamers a 3×8 ti rukod na.
Kabayatanna, inbatad ni Balbas nga intono bigat, aldaw ti Biyernes ti iskedyul ti ‘decoration baklas’ ditoy ciudad ti Laoag kadagiti saan pay naikkat a campaign materials dagiti kandidato it national level.
Innayon na a kadwa da iti ‘decoration baklas’ dagiti kameng ti PNP, DPWH ken dadduma pay a concern agencies.
