LAOAG CITY – Inakomodar ti Commision on Elections (COMELEC) iti siudad ti Batac dagiti agkalikagom nga agparehistro kas botate para iti Barangay and Sangguniang Kabataan Elections (BSKE) 2026.
Inbatad ni Ms. Cheris Mae Aguinalo, Commision on Elections (COMELEC) officer iti siudad ti Batac a nagmalmalem ti naruay a tattao ti nagurong iti opisinada.
Maladingitan daytoy gapu ta iti baet a nangrugi daytoy idi paylaeng October 2025 ket ado dagiti nangpili nga agparehistro iti maudi nga aldaw ti voters’ registration.
Gapu iti daytoy, inpakaammona a saanda a kabaelan nga akomodaren amin ket inbatadna a nagcut-off da iti alas tres ti malem ken agpapan daytoy ket saanda pay a nalpas a nagakomodar.
Iti agdama, awan pay ti maibagada a pakabuklan a bilang dagiti baro a nagparehistro ngem segun ken ni Aguinaldo, kaadoan ket dagiti immakar a botante manipud Pagudpud, Probinsia ti Cagayan, ken nagduduma pay.
Inpakaammona pay a nagtalinaed ti linak, urnos, ken talna ken awan ti nagbalin nga aberya.
Mainaig iti daytoy, inbatad met ni P/Maj. Adrian Agbannaoag, acting spokesperson ti Ilocos Norte Police Provincial Office (INPPO) nga adda ti deployed personnel iti amin a COMELEC offices no sadinno a 2 ti tunggal siudad wenno ili ken 4 met iti provincial Commision on Elections (COMELEC) office.
Ti pakabuklan, ket adda ti 50 a deployed PNP personnel.
