LAOAG CITY – Inlawlawag ni Mr. Sieg Fredo Valdez, market inspector iti ili ti Pasuquin nga umabot ti dua a bulan a nakarekep ti akin amianan a CR ti merkado publiko.
Daytoy ket gapu ta barado wenno napunnon iti fluids.
Kuna na a naitantantan ti pannakapakunnot ti septic tank gapu kadagiti naglabas a kalamidad.
Inbatad ni Valdez a nabalur ti pagbayad ti panagpakunnot iti deposito ken adda dagiti proseso pay laeng ti lokal a gobyerno para ti nasao nga addang.
Adda met ti sabali pay a mabalin a mausar nga CR iti nasao a tiendaan.
Mainaig iti daytoy, naipadanun ti problema iti konseho iti nasao nga ili para ti pannakasolbar na nangruna ket mapaspasangasangan ti panagpiyesta ti ili intono bulan ti Disyembre.
Kabayatanna, naglikudan ni Valdez iti alegasyon nga adda dagiti sumagmamano a tattao a napalubusan a nangusar ti nakarekep a CR, kasta met a naglikudan na pay akusasyon a maipagarup a mapaspasuksokan tapno makalako dagiti maseknan ti ikan iti uneg ti tiendaan, agraman pay ti maibatbato kenkuana nga agin-uunget no adda dagiti kameng ti munisipyo.
Nagpalagip ni Valdez a saysayaaten kuma met dagiti maseknan ti agusar ti public CR iti tiendaan gapu ta iti kallabes a pannakatarimaan ti CR ket awan pay ti maysa a lawas ket nadadaelen ti latong daytoy.
