LAOAG CITY – Inkari ni Batangas 1st district Rep. Leandro Leviste nga iti umno a panawen ket iparuk-atna dagiti ebidensia ti panangawat ti kickbacks manipud kadagiti maanomalya a proyekto ti Department of Public Works and Highways.
Inbatadna a nakasagana daytoyen kadagiti video mainaig kadagiti nasao nga ebidensia tapno aniaman ti mapasamak kenkuana ket sigurado a maibutaktak ti kinapudno.
Inpettengna a malaksid laeng ti Cabral Files ti iggemna nga ebidensia ngem nabalakadan isuna a saan pay ita ti umno a panawen tapno iruar dagitoy.
Kunana nga apaman a maiparuk-at dagiti ebidensia ket maawatan ti publiko no apay a babbabalawen isuna ket gapu iti buteng dagitoy iti ibutaktakna.
Mangnamnama ni Leviste a mangipaay ti kinapudno da dati a Department of Public Works and Highways Secretary Manuel Bonoan ken dati nga Undersecretary Roberto Bernardo pakairamanan dagiti agdama ken dati a cabinet secretaries ken undersecretaries nga adda ti ammoda mainaig iti maanomalya a Department of Public Works and Highways projects ken no asino dagiti nakaawat ti kickbacks.
Immuna iti daytoy, inrakurak ni Leviste a saanna a kalikagum nga ag-abroad ngem maipagarup a nakisarita dagiti sumagmamano a pannakabagi ti administrasion iti inana a ni Sen. Loren Legarda a mapan pay laeng isuna iti ballasiw taaw.
Ni Leviste ket agbiahe ti agarup 20 a pagilian manipud ita a Pebrero agingga inton Hulio 2026.
