LAOAG CITY – Plano ni Cong. Ferdinand Alexander “Sandro” Marcos III ti mangipatungpal ti temporario a solusyon iti kinangina ti pagbayad ti kuryente ditoy probinsia.
Inlawlawag na nga awan ti makita na nga alisto a mangsolbar iti nasao a problema rason nga ad-adalen na no kasano a maalay-ayan ti panagparparikut dagiti kakailian kadagiti paggastusan.
Inpalgak ti diputado a namin-adun a daras a nakisarita iti Ilocos Norte Electric Cooperative wenno INEC ken iti Energy Regulatory Commission.
Inbatad na nga adda pay dagiti gundaway a nagbugkaw iti panagunget na kadagitoy.
Nupay kasta, inannugot na nga apektado ti “electricity rate” ditoy probinsia kadagiti mapaspasamak a gubat iti sabali a pagilian rason a saan a nalaklaka a maipababa ti pagbayad ti kuryente ditoy probinsia.
Iti baet daytoy, dakkel ti namnama ni Cong. Marcos nga apaman a maamendaran ti Epira Law ket mariknanton dagiti kakailian ti pagsayaatan a maipaay dagiti naiyestablisar a wind mill ken solar power plant ditoy Ilocos Norte.
Dakkel ti pammati na a maysa daytoy kadagiti maikkan ti importansia kadagiti sumarsaruno a bulan.
