LAOAG CITY – Pinaburan ni Senador JV Ejercito ti inlungalong ni Senador Panfilo Lacson a makissayan ti P2 billion ti P7.7 billion a budget ti Senado para iti sumaruno a tawen.
Iti rakurak ni Sen. Ejercito, mangidadaulo ti Senate committee on finance, silulukat datoy iti rakurak ni Senator Lacson a chairman met ti Senate committee on accounts.
Mainaig iti daytoy, mangnamnama ni Senator Lacson a no makissayan ti P2 billion ti budget ti Senado, mabalin a tuladen daytoy dagiti dadduma pay nga agpanpanday linteg tapno makainot ti gobierno.
Immuna iti daytoy, naduktalan ni Lacson a P5 billion ti nailungalong a budget iti tawen 2027 ti Kamara de representantes.
Kunana a no kissayan da ti P2 billion ket mabalin daytoy a pagibasaran ken tuladen ti Kamara de representantes.
Kabayatanna, nagpanawagan dagiti sumagmamano a senador a tingitingen a nalaing ti national budget iti baet ti desision ti Korte Suprema a maibasura dagiti sumagmamano a porsion ti 2024, 2025 ken 2026 budgets iti Unprogrammed Funds.
