LAOAG CITY – Natay ti maysa a construction worker kalpasan a binagkong ti pada na met laeng a construction worker kabayatan ti kaadda da iti housing project da iti Barangay 17 iti ili ti San Nicolas.
Nabigbig ti biktima a ni Kenette Utuga, agtawen ti 27, baro taga Barangay Tagbilaran iti ciudad ti Bohol ngem agdama nga agnanaed iti Barangay 17 iti ili ti San Nicolas idinto a ti suspek ket ni Jefferson Borja, agtawen ti 26, baro, temporaryo nga agnanaed iti Barangay 32-C, Lapaz ditoy ciudad ti Laoag.
Iti inisyal nga imbestigasyon, rumrumuar nga immun-unan a nagin-inomen ti biktima gapu ta rinugyan na pay laeng iti bigat idi kalman.
Naamoan nga iti oras ti alas-siete idi rabii ket nagsango a naginom dagiti dua iti sango ti maysa a tianggi ken idi agpada dan a nabartek ket maipagarop nga adda ti saan da a nagkinnaawatan a nangitunda ti panaggubal ken nangbagkungan ti suspek iti bakrang ti biktima.
Naitaray ti biktima iti ospital babaen kadagiti dadduma a kaubraan da ngem naideklara daytoy a dead on arrival.
Dagus met a naglibas ti suspek ngem natiliw met laeng dagiti otoridad iti mismo a balay da babaen iti naisayangkat nga hot pursuit operation.
Agtultuloy ti naig-iget nga imbestigasyon dagiti otoridad mainaig iti napasamak a pammagkong.
