LAOAG CITY – Natiliw ti maysa a construction worker iti naiyuswat a drug-buy bust operation nga inyuswat ti Philippine National Police (PNP) iti paset ti Barangay 5 ditoy ciudad ti Laoag.
Nabigbig ti subject ti operasyon a ni Aga Ratuita, taga ili ti Pasuquin ngem adda ti pagnanaedan na iti Brgy. 5 ditoy ciudad.
Segun kadagiti otoridad, naglako ni Ratuita ti maysa a sachet a naglaon ti maipagarop a shabu ken iti pannaka-kapkap na ket narekobre pay ti tallo a sachet a maipagarop a naglaon met laeng ti illegal a droga.
Naala pay iti ikot ni Ratuita ti maysa a lighter, sangabotelya nga arak, cellphone, ID, ken ti sangaribo a pisos.
Naamoan a ni Ratuita ket maibilang nga High Value Individual ken adda iti Regional Level.
Kabayatanna, inpetteng ni Ratuita a saanna a bagi dagiti naala a maipagarop nga illegal a droga iti ikot na ngem ketdi naimula laeng.
