LAOAG CITY – Natiliw ti maysa a construction worker iti naisayangkat a drug buy-bust operation iti maysa a paggiinuman iti paset ti Brgy. 16 iti ili ti San Nicolas.
Nabigbig ti suspek a ni Jayson Mamuad, agtawen ti 35, maysa a construction worker, naasawaan ken residente iti Brgy. 8 iti met laeng nasao nga ili
Naala iti posisyon ni Mamuad ti maysa a transparent sachet a naglaon ti maipagarop a shabu, 500 a pisos a nausar ti operasyon ken maysa a plastic sachet a naglaon ti maipagarop a marijuana.
Malaksid iti daytoy, naala pay iti suspek ti kwarta a 1,510 a pisos, wallet ken maysa a motorcycle.
Kabayatanna, naiget a naglikudan ni Jayson Mamuad iti Barangay 8 iti ili ti San Nicolas ti alegasyon a naglako ti illegal a droga.
Inlawlawag na a naipagagangayen kenkuana a kalpasan ti trabaho na kas construction worker ket mapan uminom iti paset ti Barangay 16 iti ili ti San Nicolas.
Kuna na a bayat ti panagin-inom na ket simrek dagiti sumagmamano a kameng ti PNP-San Nicolas nga uray saanda a nakauniporme ket nalasin na dagitoy.
Inbatad na nga idi kinapkap dagiti kameng ti pulisya ket awan ti naala da kenkuana ken idi naposasan da ket adda metten ti inruwar da a shabu ken marijuana, malaksid pay ti 500 a pisos a marked money.
Kuna na pay a pagpudpudnuwen da daytoy no pagal-alaan na ti ilaklako na ken no siasinno dagiti laklakoan na.
Inpetteng na a ti ibagbaga ti PNP a marked money a naal da iti ikot na ket kwarta na.
Mainaig ti daytoy, isagsaganan ti Philippine National Police (PNP) iti ili ti San Nicolas ti ipila da a kaso a panaglabsing ti Republic Act (RA) 9165 wenno Comprehensive Dangerous Drugs Act of 2002 kontra ken ni Jayson Mamuad.
Daytoy ti inbatad ni Police Lt. Roi Mannuel Ordonio, ti deputy chief of police iti ili ti San Nicolas.
Segun ken ni Ordoño, nabayag dan a monmonitoren ni Mamuad sakbay a nangisayangkat da ti operasyon.
Innayon na a basar ti monitoring da ket nabayagen nga aglaklako iti illegal a droga ni Mamuad.
Nagtalinaed ti takder ni Ordoño a naala da ken ni Mamuad ti marijuana ken shabu, karaman ti marked money, nga immunan a naglikudan ti suspek.
