LAOAG CITY – Nagballaigi dagiti otoridad a nangtiliw ti maysa a lalaki iti naiyuswat a drug buy-bust operation iti Barangay Madamba iti ili ti Dingras.
Ti subject ti operasyon ket agtawen ti 33, naasawaan, construction worker, Street Level Individual ken residente iti Barangay Parado iti metlaeng nasao nga ili.
Natiliw ti suspek kalpasan a naglako ti maysa a sachet a naglaon ti maipagarop a shabu iti nagpammarang a poseur buyer no sadinno nga iti panangkapkap dagiti otoridad ket nakakumpiskar da pay iti ikot na ti sumagmamano a sachet ti maipagarop a shabu.
Agdagsen amin ti 5.5 grams dagiti naala a maipagarop a shabu manipod iti suspek ken mapatta-patta nga agbalor dagitoy ti P37, 400 a pisos.
Karaman pay a nakumpiskar iti ikot ti suspek ket ti maysa a genuine Php 1,000.00 ken 33 a pedaso ti peke a P 1,000.00 a nausar kas buy-bust money.
