LAOAG CITY – Inbatad ni Dr. Melvin Manuel, ti mangidadaulo ti City Disaster Risk Reduction and Management Office ditoy ciudad ti Laoag a kasapulan a dumalan iti panagsanay dagiti construction workers iti safety protocols wenno safety training program.
Daytoy ket kalpasan iti napamasak a pannakatay dagiti 2 construction worker a nagaburan ti nagreggaay a daga iti maar-aramid a drainage canal iti likud a paset ti Plaza del Norte and Convention Center a sakupen iti Barangay Balacad ditoy ciudad ti Laoag.
Segun ken Dr. Manuel, kasapulan a mangisayangkat dagiti inhinyero iti panagsanay para kadagiti construction worker tapno masigurado ti kinatalged dagitoy bayat iti panagtrabaho da.
Kuna na a masapol nga adda koma iti collapse structure a panagsanay dagitoy tapno masakbayan da no adda dagiti saan a nasayaat a pasamak.
Innayon na a karaman koma pay a maipaayan dagitoy kadagiti equipment a mausar para iti panangsalbar iti biag ti maysa a tao.
