LAOAG CITY – Inbaga ni ABC President Juanito Ulep iti Barangay 19 iti ili ti San Nicolas nga agtultuloy pay laeng ti maisaysayangkat a contact tracing iti barangay kalpasan nga adda ti nagpositibo ti covid-19 a kabarangayan da.
Maladingitan ni Ulep gapu ta addan ti 13 a kaso iti barangay da a nangitunda ti pannakailockdown ti tallo a sitio.
Inbatad na a naiget ti panagbantay da iti aldaw ken rabii no sadinno a mapuypuyatan dagitoy ngem aramiden da ti pagrebbengan da kas opisyal ti barangay.
Inpakaammo na nga addan ti 55 a naswab test manipod iti tallo a sitio ken manamnama nga adda pay ti maipadalan iti swab test kadagiti sumarsaruno nga aldaw.
Kabayatanna, inadmitir ti ABC President nga adda latta dagiti natangken iti ulo na nga ipilit na ti rumuar
uray nakalockdown ti lugar da.
Gapu iti daytoy, kuna na a kanayun ti panangbagbaga da kadagiti kabarangayan da nga aganus ken saan da koma pay laeng a rumrumuar gapu ta naka-lockdown da.
