LAOAG CITY – Naipilan ti kaso a panaglabsing ti Republic Act 10591 wenno Comprehensive Firearms and Ammunition Regulation Act kontra iti maysa a contractor a natiliw kabayatan ti Operation-Bakal iti maysa a bar iti Barangay 9 ditoy ciudad ti Laoag.
Ti suspek ket agtawen ti 37, naasawaan, contractor ken taga Bulacan.
Basar iti Philippine National Police, kabayatan ti panaginspeksyon da iti maysa a bar iti nadakamat a barangay ket nakita iti uneg ti bag ti suspek ti maysa a cal. 380 nga addaan ti magazine nga addan ti pito a bala.
Malaksid iti daytoy, nakumpiskar pay iti suspek ti dua a magazine no sadinno a ti maysa ket addaan ti pito a bala idinto a ti maysa ket addaan met ti innem bala.
Awan ti naipakita ti suspek a dokumento ken lisensya na nga agikot ti paltog isut gapuna nga inarestar a dagus dagiti otoridad.
Mainaig iti daytoy, inbatad ni Police Lt. Col. Andrew Rabang, ti chief of police ditoy ciudad ti Laoag a naiget ti panangipatungpal da ti surpresa a panagbisita kadagiti paggiinuman ditoy ciudad ti Laoag tapno masigurado ti linak, urnus ken talna, kasta met ti kinatalged dagiti agturturong kadagiti nadakamat a lugar.
