LAOAG CITY – Rinugianen ti Department of Agriculture (DA) ti barangay-level rollout ti P20 iti kada kilo a bagas idiay Davao City kas panangipalawa ti programa a “Benteng Bigas, Meron Na!” ti administrasion.
Immunan a naisayangkat ti panangibunong iti Barangay Matina Crossing ken sinaruno ti Barangay Tungkulan iti Toril District idi Pebrero 20, iti panangidaulo ni Assistant Secretary for Agribusiness, Marketing and Consumer Affairs Genevieve Velicara-Guevarra pakairamanan dagiti opisial ti barangay ken pannakabagi ti National Food Authority (NFA) ken Food Terminal Corporation (FTI).
Inbatad ni Guevarra a napateg ti aktibo a pannakipartisipar ti lokal a gobierno tapno masigurado a makadanon iti subsidized rice kadagiti target a benepisiario kas kadagiti indigent, senior citizen, persons with disabilities, minimum wage earner ken solo parents.
Kunana a nakatulong ti P20 a Benteng bigas masterlist registry system, maysa nga online registry dagiti benepisiario tapno mapaalisto ti panangberipikar ken panaggatang ti bagas.
