LAOAG CITY – Inpakaammo ti maysa a Counselling Professional a ni Ms. Divine Sevilla a dakkel ti epekto kadagiti estudiante iti intero a pagilian ti napasamak a pammaltog idiay Tacloban City.
Daytoy ket kalpasan nga adda dagiti estudiante ken nagannak ti nag-panic iti maysa a pagadalan ti Quezon City nga inpagarupda nga adda ti nagpaputok ti paltog ngem nagkanalbuong laeng iti maysa a construction site.
Segun ken ni Sevilla, saan a malappedan ken maliklikan ti panagbuteng dagiti agad-adal ken dagiti nagannak dagitoy gapu iti nakaam-ames a napasamak idiay Tacloban City.
Inbatadna a ti pannakapasar ti trauma ket saan nga insigida a maikkat iti maysa nga indibidual gapu ta mabalin nga agpaut daytoy iti sumagmamano a bulan wenno umabot pay iti makatawen depende iti kapigsa ti pakinakem ti maysa a tao.
Kunana nga al-alisto a makarekobre dagiti maseknan no napigpigsa ti support system iti pamilia wenno aglawlaw.
Innayonna a dagiti makapadas ti nakaam-ames nga insidente ket mabalin a makarikna ti anxiety, depression ken post-traumatic stress disorder.
