LAOAG CITY – Inabak ti Golden State Warriors ti Dallas Mavericks ti 24 big points iti tulong ti 30-point performance ni NBA superstar Stephen Curry.
Saan nga inpalubos ti Warriors ti Dallas no sadinno nga iti umuna a kuarter pay laeng ti nakaaramiden ti koponan ti 33 points kontra iti 18 points ti Mavs.
Ad-adda pay daytoy a ngimmato agingga a nadanon ti 25-point deficit iti panagleppas ti 3rd quarter.
Gapu iti daytoy, pinaginanan ti Warriors dagiti superstar daytoy iti 4th quarter.
Iti uneg ti 29 a minuto a panagay-ayam ket naaramid ni Curry a makapastrek ti 30 points ken mangibulsa ti pito nga assists idinto nga 18 points met ti naaramid ti baro a Warriors forward a ni Jimmy Butler.
Nakaaramid met ti career-high a 13 rebounds ti sophomore a ni Brandin Podziemski pakairamanan ti 17 points iti uneg ti 30 a minuto iti panagay-ayamna.
