LAOAG CITY – Umaboten iti P203.38 million ti naimaldit a danyos ti nagpagtipon nga epekto ti Bagyo Carina ken Habagat iti sektor ti agrikultura ditoy Pilipinas.
Basar kaudian a datus nga inruar ti Department of Agriculture – Disaster Risk Reduction and Management (DA-DRRM) Operations center, kaaduan kadagiti naapekataran nga agricultura products ket pagay, mais, ken high value commercial crops, nga intunda ti nasaknap a layus.
Karaman ditoy ti 10,688 nga ekterya a plantasion, idinto a 2,574 metriko tonelada ti apit ti nadadael.
Umabot metten iti nasurok siyam a ribu a mannalon ti naapektaran, segun iti Department of Agriculture, no sadinno a kaaduan kadagitoy ket manipud kadagiti Department of Agriculture Regional Field Offices (RFOs) iti Central Luzon, Mimaropa, Western ken Eastern Visayas, Zamboanga Peninsula, Soccsksargen ken Caraga Region.
Agtultuloy met ti panangisayangkat ti Department of Agriculture iti field validation mainaig iti epekto ti bagyo, bayat nga agtultuloy met ti iseserrek dagiti kanayonan a report manipud kadagiti field offices-na.
Kabayatanna, inpanamnama met ti ahensia ti naan-anay a tulong a maiwaras kadagiti biktima a mannalon.
