LAOAG CITY – Nakaawat ti pangta a panagpabettak ti bomba wenno bomb threat ti Data Center College of Laoag.
Segun kenni Mr. Joseph Sicco, ti Presidente ti Data Center College of Laoag, naawat da ti pangta babaen iti social media page ti pagadalan nga imanmanehir ti HR Department da.
Inbatad na a nakailanad iti bomb threat message nga adda ti tallo a bomba a naimula iti baro a building ti pagadalan.
Kunana nga apaman a naawat da daytoy ket dagus da nga inreport kadagiti otoridad ken minandar na dagiti security personnel nga irikep amin a gate ken saan da nga agpastrek kadagiti estudyante.
Inbatad na nga alas-otso ti bigat a narugyan ti inspeksyon babaen kadagiti kameng ti Philippine National Police ken bomb squad ken nalpas iti pasado alas-nuebe ken awan met ti nakita da nga eksplosibo ken naipakammo a natalged ti pagadalan isut gapo na a nagpastrek da kadagiti estudyante.
Kunana a basar iti pannakisarsarita na kadagiti otoridad ket adda ti pagpadaan ti account a nausar kadagiti bomb threat a naawat ti Mariano Marcos State University.
Innayon na nga ipaima nan kadagiti otoridad ti pannakaiyuswat ti naun-uneg pay nga imbestigasyon ken paigetan da pay ti pananginspeksyon da kadagiti amin a sumrek iti pagadalan.
Kabayatanna, daytoy met ti ummuna a gundaway nga adda ti naawat a bomb threat ti nasao a pagadalan.
