LAOAG CITY – Naikkat iti serbisyo ni dati a Bulacan first district engineer Henry Alcantara iti baet ti imbestigasyon iti anomalya iti flood control projects.
Inrakurak daytoy ni Department of Public Works and Highways (DPWH) Secretary Vince Dizon kabayatan ti pananginspeksyon na iti flood control project idiay Barangay Sipat, Plaridel, Bulacan.
Segun kenni Dizon, malaksid iti daytoy ket kiddawen na pay iti Legal Service ti ahensya nga irekomendar ti pannakaipila ti kaso kriminal kenni Alcantara iti Ombudsman iti sumaruno a lawas.
Iti naisayangkat a Senate hearing iti napalabas nga aldaw, inadmitir ni Alcantara a nangisyu ti certificate of completion iti P55 million flood control project idiay Baliwag ken naduktalan a daytoy ket ghost project.
Inlawlawag met ni Alcantara a nagtalek iti inspection report ti grupo na.
Malaksid iti daytoy ket inadmitir pay ni Alcantara a nagusar ti alias ken peke nga ID tapno makastrek iti casino iti laksid a maiparit kadagiti empleado ti gobierno ti agsugal kas nakaiyataday iti Administrative Code of 1987.
Iti panagtakem na kas 1st district engineer, iggem ni Alcantara ti 13 nga ili iti Bulacan pakairamanan ti flood-prone area a kas iti Hagonoy, Baliwag, Calumpit, ken Malolos.
Ti opisina na idi ti addaan ti kangatoan a project cost kadagiti implementing offices iti Department of Public Works and Highways nga umabot iti 450 flood control projects ken agbalor ti P28.9 billion manipud iti 2022 agingga iti 2025 basar iti datos ti Sumbong ng Pangulo website.
Naamoan a ti reinforced concrete river wall project idiay Barangay Piel, Baliwag ket awat ti Syms Construction Trading ken daytoy ti kapada a proyekto a naduktalan a ghost project.
Kabayatanna, kuna ni Dizon a ti proseso para met iti pannaka-dismiss da Brice Hernandez ken Jaypee Mendoza a nagserbi met laeng iti Bulacan district engineering office ket dandanin mangrugi.
