LAOAG CITY – Naidatag ni dati a Department of Public Works and Highways Secretary Manuel Bonoan iti Sandiganbayan tapno agatendar iti court hearing mainaig iti kaso na a graft gapu iti maipagarop a panagawat na ti kickback iti flood control projects.
Ni Bonoan ket binayabay dagiti kameng ti Criminal Investigation and Detection Group (CIDG) a nagturong iti Sandiganbayan Second Division.
Inbatad ni CIDG National Capital Region chief PCol. John Guiagui nga ur-urayen dagiti otoridad ti agbalin a resulta ti panagdengngeg sakbay a madeterminar no maisubli ni Bonoan iti PNP General Hospital.
Immunan a pinatgan ti Sandiganbayan ti kiddaw ni Bonoan nga agtalinaed iti PNP General Hospital kabayatan a nakapeding paylaeng ti kaso na.
Kabayatanna, inpasingked ni Guiagui a nakasagana da nga agtungpal iti aniaman a direktiba ti korte mainaig iti agdama a sitwasyon ni Bonoan.
