LAOAG CITY – Inrakurak ni Senate President Pro Tempore Panfilo Lacson nga agsagsagana ni dati a Department of Public Works and Highways Undersecretary Catalina Cabral a mangipaay ti “tell-all” mainaig iti kontrobersial iti flood control sakbay a natay idi Disiembre 18.
Inbatad ni Lacson a nakikoordinar ni Cabral kenkuana ken nakasagana a mangipaay ti impormasion kalpasan a dinakamat isuna ni dati a Department of Public Works and Highways Undersecretary Roberto Bernardo iti maysa a panagdengngeg ti Senate Blue Ribbon Committee.
Naikeddeng nga agbalin a napudno ni Cabral mainaig iti Special Allotment Release Orders (SARO) pakairamanan dagiti dokumento a maipagarup a nakaipalaon ti P50 bilyon nga unprogrammed fund insertions iti nailian a pundo sakbay daytoy a natay.
Basar iti maipagarup a “Cabral files,” adda ti lima a miembro ti Gabinete nga addaan ti allocable ken non-allocable funds iti 2025 budget pakairamanan ti maysa nga opisial a dinakamat laeng kas “ES” nga addaan ti P8.3 bilyon.
Ti dati a Department of Public Works and Highways Secretary Manuel Bonoan ket addaan ti record a P30.5 bilyon idinto a dagiti sumagmamano a Cabinet secretaries ket addaan ti sag-P2 bilyon pakairamanan ti binilyon para iti House leadership ken sumagmamano a party-list representatives.
Kabayatanna, ti maipagarup a Cabral files ket naglaon ti report ti Department of Public Works and Highways allocations iti kada distrito, probinsia ken rehion manipud idi 2023 agingga iti 2026 ken maipagarup nga inpasa ni Cabral ken ni Batangas 1st District Rep. Leandro Leviste nga inruar ti agpanpanday linteg kalpasan ti pannakatayna.
