LAOAG CITY – Inpetteng ti kampo ni pimmusay a dati a Department of Public Works and Highways (DPWH) Undersecretary Catalina Cabral a saan a liniklikan ti dati nga opisyal ti panagdengngeg ti Independent Commission for Infrastructure (ICI) mainaig iti maanomalya a flood control projects.
Segun iti abogado ni Cabral a ni Atty. Mae Divinagracia, saan da a nakaawat ti abiso wenno subpoena manipod iti komisyon.
Inlawlawag pay ti abogado a simmangon ni Cabral iti Independent Commission for Infrastructure idi Setyembre 2025 ken nabalakadan nga aguray laengen ti subpoena no kasapulan.
Inpetteng ti abogado a nagtalinaed a nakasagana ti kliyente na a makitinnulong iti imbestigasyon.
Inbatd met ni Independent Commission for Infrastructure spokesperson Brian Hosaka a nangiparuk-at ti komisyon ti subpoena idi Disyembre 9 iti babaen ti Department of Public Works and Highways ken ti naudi a panagdengngeg para iti 2025 ket idi Disyembre 15.
Kuna na nga imbitaran da koma manen ni Cabral no naaddaan pay ti panagdenggeg ngem naitantan daytoy gapu iti panagikkat ti dua a komisyoner ken iti ipupusay ti dati nga opisyal ti DPWH idi Disyembre 18.
Maipalagip a nairaman ti nagan ni Cabral iti maipagarop a maanomalya a flood control projects kalpasan nga inbutaktak ni dati a DPWH Usec. Roberto Bernardo iti panagdengngeg ti Senate Blue Ribbon Committee idi Nobiyembre 14, 2025 a ni Cabral ken dati a DPWH Sec. Manuel Bonoan ti maipagarop a nangipataray ti kickback system iti Department of Public Works and Highways.
