LAOAG CITY – Pimmusayen ti dati a Kenyan Prime Minister a ni Raila Odinga iti tawenna a 80.
Natay ti dati a Kenyan Prime Minister kabayatan a matamtaming iti ospital idiay India.
Basar kadagiti otoridad idiay India, kabayatan a magmagna ni Odinga kaduana dagiti miembro ti pamiliana ken ti personal doctor-na ket kellaat daytoy a natulid.
Gapu iti daytoy, insigida a naitaray iti kaasitgan nga ospital ngem naideklarar a pimmusay.
Iti napalpalabas a lawas, adda dagiti espekulasion maipanggep iti salun-atna ngem saan nga inkankano dagiti miembro ti pamiliana ken dagiti kaalyadona iti pulitika dagiti report a mangipasimudaag nga addaan daytoy ti kritikal a sakit.
Indanon ti pannakipagladingit dagiti pulitiko ken dadduma pay a lider pakairamanan ni Ethiopian Prime Minister Abiy Ahmed.
Naammoan a namin-lima a daras a nagpaidasig iti kina-Presidente ni Odinga ngem napaay daytoy no sadinno a kanayonna nga ibagbaga a natakaw ti balligi kenkuana.
