LAOAG CITY – Inbutaktak ni dati a Laoag City Mayor Roger Fariñas nga adda ti iggem na a kopya ti kontrata ti INEC ken Masinloc nga isu ti pagapgappoan ti suplay ti kuryente.
Inbatad na a nu pay saan na a maibutaktak amin a linaon daytoy ket adda ti sumagmamano a naobserbaran na a para kenkuana ket kwestionable.
Kuna ni Fariñas a maysa ditoy ket ti kaawan ti authorization ni dati nga INEC board president Rey Lazo ken agdama a General Manager Herbert Agdigos iti kontratra iti 20 a tawen a kontrata iti Masinloc ken nangrugi idi 2015.
Daytoy ket iti baet nga adda ti authorization dagiti walo a sabali pay a kooperatiba iti Rehiyon 1 pakairamanan iti M. Province.
Inbatad ni Fariñas a malaksid iti kaawan ti authorization ket kwestyunable pay ti 20 a tawen a kontrata ti INEC ken Masinloc gapu iti kaatiddog daytoy.
Innayun na a basar iti nayun a nabasa na iti kontrata ket awan pay ti nailanad a nagan ti Energy Regulatory Commission (ERC) nga isu koma ti kangrunaan a mangobserbar kadagiti garaw ti kooperatiba.
Kabayatanna, kuna ni Fariñas nga iti pannakisarsarita na kadagiti sumagmamano a miembro ti INEC partikular ken ni spokesperson Noel Andres ket nagbalin a 20 a tawen ti kontrata ti kooperatiba iti Masinloc gapu ta maysa kadagiti kadakkelan rason a nakiddaw ti at-tiddog a panawen a panagangkay ti kuryente.
Gapu iti daytoy, inbatad ti dati a mayor a naiget ti balakad na a manayunan dagiti pagangkatan ti kuryente tapno maliklikan ti nakaro a pannakaapektar dagiti member consumers.
Immunan a nadakamat ni Fariñas a nu kalikagum a manggeg ti boses dagiti member consumers ket masapol a nangatngato ngem 50% dagiti agpirma iti petisyon kontra iti kooperatiba.
