LAOAG CITY – Mangipila ti countercharge ti dati a Mayor iti ili ti Dingras a ni Marynette Gamboa kontra ken ni Atty. Cocoy Ruiz, baro daydi napapatay a ni dati nga Ilocos Norte Electric Cooperative wenno INEC Board President Lorenzo Rey Ruiz.
Segun kenkuana, daytoy nga addang nga aramidenna ket saan a kas panangibales ken ni Ruiz no diket panangipakitana iti amin nga awan ti basolna.
Inbatadna nga agbalin nga adal daytoy ken ni Ruiz gapu ta nagpadiktar isuna kadagiti inaramidna a tignay iti baet nga ammona a saan a pudno ti maiyak-akusar kontra kenkuana gapu iti pulitika.
Inlawlawagna a desidido daytoy a mangipila ti countercharge para iti pagsayaatan dagiti tattao ken sumaruno pay nga henerasion tapno saan a basta a mapilaan ti maysa nga indibidual nga awan met ti basolna.
Kunana a saan nga ang-angaw ti nagbalin a padasna iti panangilabanna ti naipila a kaso a murder kenkuana iti uneg ti 16 a tawen.
Inpaganetgetna a malaksid kadagiti abugadona a nangiggem ti kasona ket awan sabali no diket ti Dios ti nagkapetanna tapno saan a sumuko iti kadakkelan a karit iti biagna.
Innayonna a no maipaayan daytoy ti gundaway nga agpaidasig iti eleksion ket silulukat isuna nga agsubli iti lubong ti pulitika.
Kabayatanna, inpakaammo ni Atty. Juanito Antonio, maysa kadagiti abugado ti dati a Mayor a balligi a nagun-od ti hustisia gapu ta awan ti nadagsen nga ebidensia manipud iti prosekusion a nangpatibker iti naipila a kaso kontra iti dati a Mayor isut gapuna a na-acquit daytoy.
Maipalagip a simmango ni Gamboa iti kaso a murder gapu ta maitudtudo isuna a mastermind wenno akin-utek iti pannakapapatay ni Ruiz idi 2009.
Naammoan a nagpiyansa ti 400 a ribu a pisos ni Gamboa para iti temporario a pannakawaya-wayana idi Disiembre 2023.
Immuna iti daytoy, namindua a daras a saan a nakaatendar iti promulgation ni Gamboa gapu ta naitaray iti ospital idiay Metro Manila kalpasan a ngimmato ti blood pressure-na.
