LAOAG CITY – Inlawlawag ni Mr. Justine Paul Marbella, ti Communication Officer ti Department of Labor and Employment (DOLE) Region 1 a rumbeng laeng a maipaayan ti sweldo dagti nagtrabaho wenno nagtagibalay.
Daytoy ket kalpasan nga adda ti naidanon nga impormasyon ditoy Bombo Radyo Laoag a ti maysa a nagtagibalay ket maipagarop a saaan a nasweldon sipud nangrugi idi Pebrero 2022 ken naglippas idi Hulyo ita met laeng a tawen.
Malaksid iti daytoy, rumrumuar a ti naibaga iti nasao nga empleado ket agtutor laeng iti ubing, ngem maipagarop a pinagtrabaho ti employer na iti trabaho iti uneg ti balay.
Naamoan a ti rason ti employer a saan na a maited ti sweldo ti maseknan ket gapo ta na-block ti ATM na.
Segun kenni Marbella, ti ummuna a kapintasan nga aramiden ti maseknan a dati nga empleado ket kasarita na ti amo na ngem no saan latta a masolbar ket idanon na iti barangay nga akin-sakop iti balay a nagtrabahoan na.
Mainaig iti daytoy, kunana a saan a karaman dagiti households nga inspeksyonen ti ahensya no diket dagiti laeng pribado nga estbalishimento.
Nupay kasta, inbatad na a ti Dept. of Interior and Local Government ti addaan ti mandato iti kastoy a sitwasyon.
