LAOAG CITY – Kinondenar ti maysa a miembro ti kamara de representantes dagiti agama nga isuda dati a Presidente Rodrigo Duterte ken Vice President Sara Duterte gapu iti panagiwaras da ti kinadamsak, uray iti pampubliko a diskurso.
Nagballaag ni Assistant Majority Leader ken Taguig City Rep. Pammy Zamora ti Young Guns bloc, dagiti kastoy a rakurak ket mangpapigsa ti kultura iti kaawan ti linteg ken mangpakapuy iti demokrasya.
Krinitikar pay ti agpanpanday linteg dagiti nagbalin a rakurak ti dati a presidente iti kallabes no sadinno nga inyangaw na nga inbaga a papatayen na ti 15 a senador tapno maikkan ti gundaway dagiti kaalyado na a kandidato iti senado.
Dinillaw na met ti bise presidente no sadinno nga inpetteng na nga awan ti nagdumaan da iti ama na no maipapan iti istilo ti panangidaulo.
Inpaganetget ni Zamora a ti panangidaulo ket saan a maipapan iti panagisaknap iti buteng no di ket panangipaay ti panagtalek ken kumpiyansa ti umili.
Inpetteng ti kongresista nga iti babaen ti administrasyon Duterte ket rinibo a tattao ti natay iti nadara a giyera kontra iti illegal a droga nga agtultuloy nga im-imbestigaren ti international human rights bodies.
